कोरोना संक्रमणका कारण भारतमा ज्यान गुमाउनेको संख्या ४२३


काठमाडौं, ०४ बैशाख । कोभिड १९ नाम दिइएको प्राणघातक कोरोना भाइरस संक्रमणका कारण छिमेकी राष्ट्र भारतमा ज्यान गुमाउनेको संख्या ४ सय २३ पुगेको छ ।

वल्र्डोमिटर्सको ताजा अपडेट अनुसार हालसम्म संक्रमितको संख्या १२ हजार ४ सय ५६ पुगेको छ । जसमध्ये महाराष्ट्रमा मात्रै तीन हजार भन्दा बढी संक्रमितको संख्या पुगिसकेको जी न्यूजको दाबी छ ।

यसैबीच एक हजार पाँच सय १३ निको भइसकेका छन् । हालसम्म भारतमा १ हजार ९ सय ३६ वटा कोरोनाका केसहरु बन्द भइसकेका छन् ।

यो पनि पढ्नुहोस

काठमाडौंका सडकहरु चिटिक्क बन्दै, २८ किमी सडकमा लगाइयो चिन्ह

काठमाडौं, ०४ बैशाख । काठमाडौँका सडकहरुलाई चिटिक्क बनाउने काम भइरहेको छ । सडक व्यवस्थापनको अभिन्न अङ्ग मानिने सडक चिन्ह (मार्किङ) लगाउने काम भइरहेको छ ।

अहिलेसम्म जिल्लाभित्र कालोपत्र थपिएको (ओभर ले) झण्डै २८ किलोमिटर सडकमा चिन्ह लगाएको डिभिजन सडक कार्यालय काठमाडौँले जनाएको छ । ‘लकडाउन’ का कारण सबै विकास निर्माण ठप्प हुँदा काठमाडौँका मुख्य र सहायक सडकमा चिन्ह लगाइएको हो ।

ती सबै स्थानमा सामाजिक दूरी कायम गरेर काम भएको डिभिजन सडक कार्यालय काठमाडौँका प्रमुख कुबेर नेपालीले बताए ।

धेरै जनशक्ति र उपकरण नचाहिने हुँदा यो समयमा समेत काम गरिएको उनले बताए । उपत्यकामा बालुवाटार, रामशाह पथ, सुन्धारालगायतका धेरै स्थानमा सडकमा चिन्ह लगाइएको छ ।

उनले भने, “सामान्य अवस्थामा सवारीसाधनको चाप बढी हुने भएपनि अहिले सडक खाली हुँदा काम गर्न पनि सजिलो भयो ।” सडकका दुबै लेनमा ‘ओभर ले’ भएका सडकमा मात्रै सडक चिन्ह लगाइएको हो ।

काठमाडौँ उपत्यकामा धेरै स्थानमा ‘ओभर ले’ को काम ‘लकडाउन’ का कारण ठप्प छन् । तीनकुने–गौशाला लगायत एकातिर काम सकिएर अर्को लेनतर्फ गर्न बाँकी रहेकाले त्यस्ता सडकमा भने चिन्ह लगाइएको छैन ।

उनले भने, “अर्को लेनमा कालोपत्र गर्दा रङ्ग जाने हुनाले अहिले नगरिएको हो ।”

‘लकडाउन’ का समयमा सडक चिन्ह लगाउने कामका कारण उपत्यकाका सडक चिटिक्क देखिएका छन् । एकातर्फ सवारीसधानको चाप कम र अर्कातिर भर्खर कालोपत्र भएका सडकमा पोतिएका सडक चिन्हले उपत्यकाको मुहार नै फेरिएको छ ।

‘लकडाउन’ मा काम गर्दा कतै अवरोध आउँछ कि भन्ने अन्यौल भएपनि अहिले यो कामले धेरैको प्रशंसा पाइरहेको छ । सडक चिन्हका कारण यात्रु र चालकसँगै ट्राफिक प्रहरीलाई समेत सडक व्यवस्थापन गर्न सजिलो हुने गरेको छ । Source:News24nepal filephoto

Leave a Reply

Your email address will not be published.

Back to top button